Rock cake及鮮果沙律製作班
Rockcake及鮮果沙律製作班已在9月24日完滿結束，以下是我們的秘書Eliza的分享：
今天終於回到那些年，一起整rock cake 嘅日子， 幹事們一朝早一齊去買材料， 然後烚蛋煮薯仔、 秤糖秤麵粉、搬檯搬凳， 預備所需嘅工具， 忙個不亦樂乎! 約下午兩點 ， 陸陸續續見到校友帶同佢哋嘅仔仔女女踏入家政室， 大家好興奮能見番多年冇見既同班同學，互相問好， 熱鬧非常。
於校友會會長及林校長致詞之後，活動正式展開， 今次共有四十位校友帶同小朋友參加活動， 由於人數眾多，需要分兩批進行; 一批先做rock cake; 另外一批整沙律，然之後互相調換。望住校友循循善誘地指導小朋友切蘋果、切薯仔及撈沙律，小朋友一面正經地做實事，真令人欣喜。另一邊廂，大家留心地睇著Zanna及Carol示範整rock cake，輪到大家整rock cake了， 整出大大細細、甚至條狀以至心型狀的rock cake,玩得好開心。對於第一次整rock cake的小朋友來講，相信最期待是睇到rock cake出爐的一剎那。
由於需要輪流將一盤盤rock cake放入焗爐裏面焗， 在等候嘅時間，大家傾談著，回緬以前係家政室嘅日子， 依稀記得家政老師嘅叮嚀，彷彿回到從前。 嘩!! 等到rock cake出爐啦! 大家品嚐著自己親手整嘅rock cake, 食得好滋味，我禁不住，訪問一下小朋友，統計結果一致話好食、會再整。
終於來到尾聲，當然是來個開心大合照，留住大家既愉快又滿足的笑臉。這次活動得以圓滿完成，當然要感謝林校長、副校歐太、老師文太、Christy老師及三位工友的幫助。希望下次活動能夠再見到大家。
